د غزني د ولایتي شورا ریس وايي، د دولت وسله والو مخالفینو ددغه ولایت په اندړو ولسوالۍ کې کابو درې سوه ماینونو خښ کړي دي.
د غزني د ولایتي شورا ریس، عبدالجامع جامع وايي، طالبانو دا ماینونه د اندړو ولسوالۍ په کرنیزو ځمکو، لارو او دښتو کې ځای پر ځای کړي دي. نوموړی له افغان حکومت څخه غواړي چې دغې موضوع په جدي ډول تعقب کړي.
د اندړو ولسوالۍ یو شمیر اوسیدونکي وايي، هره ورځ د دغې ولسوالۍ په کلیو کې ماینونه چوي، چې له امله یې خلکو ته مالي او ځاني زیانونه اوړي.
د غزني والي هم دا مني چې د دولت وسله والو مخالفینو په اندړو ولسوالۍ کې ګڼ شمیر ماینونه خښ کړې دي. نوموړی د ماینونو د چاودنو مخنیوی ناشوني بولي.
