د زیږیدو کال: ۱۳۳۸

ملیت: پښتون

ډاکټر عبدالله عبدالله،  د غلام محي الدين خان زمرياني زوى دى چې په ١٣٣٨ هجري لمريز کال کې په کابل کې زېږېدلى. پلار يې په افغانستان کې د شاهي دولت پر مهال د شورا په وروستيو کې له کندهار ولايت څخه دانتصابي سناتور وو.

ښاغلی عبدالله د کابل طبي پوهنتون څخه فارغ شوی دی او د کابل د سترګو روغتون کې له له دوه کاله دندې ترسره کولو وروسته په ۱۳۶۳ کال کې پاکستان ته کډوال شو. ده د شمال له جبهو سره د جګړو پر مهال د روغتیا په برخه کې دنده ترسره کړې ده.

نوموړی ډیر ژر په پنجشیر کې د مجاهدینو د مشهور قومندان، احمد شاه مسعود نږدې کس شو او د هغه اعتماد یې ځانته راجلب کړ. د مجاهدینو تر بریا وروسته له ۱۳۷۱ تر ۱۳۷۵ کلونو پورې کله چې مسعود د دفاع وزیر وو، عبدالله د هغه د ویاند او دفتر ریس هم پاتې شوی دی.

د طالبانو لخوا د کابل تر نيولو وروسته نوموړى له ١٣٧٥ تر ١٣٨٠ کال پورې په شمال کې د برهان الدين په مشرۍ د افغانستان د اسلامي دولت د بهرنيو چارو وزارت مرستيال او سرپرست وو. نوموړی د احمد شاه مسعود تر وژل کیدو وروسته له طالبانو سره د جګړې پر مهال د متحدې جبهې ویاند وو.

ډاکټر عبدالله د بن غونډې د پریکړې په اساس او د ولسمشر حامد کرزي د لنډمهالې ادارې د بهرنیو چارو وزیر وټاکل شو او تر ۱۳۸۵ کال پورې په دغه دنده کې پاتې شو. خو په کابينه کې د بدلونونو په ترڅ کې ډاکټر رنګين دادفر سپنتا د هغه ځاى ناستى شو.

عبدالله په تېرو ولسمشريزو ټاکنو کې د مخکښو کانديدانو له ډلې وو، چې د راى شمېرنې په پايله کې د اوسني ولسمشر حامد کرزي وروسته ډېرې رايې ترلاسه کړې وې. هغه مهال ټاکنې دوهم پړاو ته لاړې خو نوموړي د ټاکنو په دوهم پړاو کې له ګډون ډډه وکړه، له همدې امله ولسمشر حامد کرزی د ټاکنو کمیسون لخوا د انتخاباتو ګټونکی اعلان شو.

نوموړى د ۱۳۹۳ کال ولسمشريزو ټاکنو لپاره نوماند دى. ده د عبدالهادي ارغندیوال په مشرۍ د حزب اسلامي او استاد محقق په مشرۍ له حزب وحدت اسلامي ګوند سره ایتلاف کړی د.

انجینير محمد خان يې لومړى مرستيال او حاجى محمد محقق يې دويم مرستيال دى.