ملي دفاع وزارت نن دوشنبې (د وږي په ۱۸مه) په یوې خبرپاڼه کې وویل چې د بدخشان یمګان ولسوالۍ له څلورو کلونو وروسته بېرته د امنیتي ځواکونو لاس ته ورغله.

په خبرپاڼه کې راغلي دي چې امنیتي ځواکونو دوه اوونۍ مخکې په دغې ولسوالۍ کې هوايي او ځمکني عملیات پیل کړل چې د هغه په پایله کې بهرنیو او کورنیو طالبانو ته درنه مرګ ژوبله اوښتې ده.

خبرپاڼه همدارنګه کاږي چې یو ډېر شمېر طالبانو امنیتي او دفاعي ځواکونو ته تسلیم شوي دي.

په ورته‎مهال کې د بدخشان والي زکریا سودا طلوع نیوز ته وايي چې طالبانو خوستک ولسوالۍ او ځينو نورو ناامنه برخو ته تښتېدلي دي.

بلخوا طالبانو بیا په دې اړه څه نه دي ویلي.

له دې درې ورځې مخکې، د دغه ولایت ودروج ولسوالۍ هم امنیتي ځواکونو له پنځو کلونو وروسته ولکه کړه.