د وردګو ولایت سیمه ایز چارواکي وايي، نن سهار په دغه ولایت کې د یوې چاودنې له امله د پولیسو څلور افسران وژل شوې او اولس نور امنیتي سرتیري ټپیان دي.

د وردګو د ولایت مقام په خپره کړې خبرپانه کې ویلي، چې یوه برید کونکي د نرخ ولسوالۍ د امنیه قومندانۍ مخکې د چاودیدونکو توکو ډک موټر ته چاودنه ورکړه.

د وردګو د والي ویاند، عطاالله خوګیاني وویل:«د نرخ ولسوالۍ د پولیسو د امنیه قومندانۍ ودانۍ په دغه برید کې زیانمنه شوې او د څلورو ټپیان روغتیايي حالت د اندیښنې وړ دی.» په همدې حال کې طالبانو په یوه خبرپاڼه کې ددغې پیښې مسوولیت پر غاړه اخستی دی.

له بلې خوا په ننګرهار ولایت کې د بم چاودنې له امله اته محصلین ټپیان شوې دي. د ننګرهار د والي ویاند، احمد ضیا عبدالزي وویل، دا چاودنه د ننګرهار پوهنتون د ښوونې روزنې پوهنځۍ د موټرو په تم ځای کې د ځای پر ځای شویو چاودیدونکو توکو له امله رامنځته شوې ده. ده وویل، چاودیدونکي توکي په یوه موټر سایکل کې ځای پر ځای شوې و.

ښاغلی عبدالزی زیاتوي، د پیښې قربانیان ولایتي روغتون ته لیږدول شوې دي. دده په وینا، پولیسو د موټر سایکل خاوند نیولی دی. تراوسه کومې ډلې ددغې پیښې مسوولیت پر غاړه نه دی اخستی.