د بشري حقونو د څار نړیوال سازمان د امریکا له حکومت څخه وغوښتل چې د وردګو ولایت په نرخ ولسوالۍ کې د اتلس ولسي وګړو د وژنې د پیښې سمه څیړنه وکړي.

د رولینګ سټون مجلې په خپل ریپوټ کې ویلي، چې د امریکا ځانګړو ځواکونو تیر کال د وردګو په نرخ ولسوالۍ کې د اتلسو ولسي وګړو په وژنه کې رول درلود.

په افغانستان کې د بشري حقونو د څار سازمان د امریکا پر دولت نیوکه کوي او زیاتوي، چې دغه پیښه یې په جدي ډول نه ده څیړلې.

د رولینګ سټون مجلې، په تیر کال کې د اتلسو افغانانو د وژلو په پیښه کې د امریکايي ځانګړو ځواکونو ونډه روښانه کړې ده. اوس د بشري حقونو د څارې ادارې د امریکا له دولته غوښتي دي چې دا پیښه په بې پرې او بشپړه توګه وڅیړي. په افغانستان ګې د دغې ادارې استازې وايي چې باید ددغې پیښې عاملان د قانون منګلو ته وسپارل شي.

په افغانستان کې د بشري حقونو د څار د سازمان څیړونکی، هیدر بار وايي:«موږ په دې اړه سمې او هر اړخیزې څیړنې غواړو، تر څو روښانه شي چې کوم کسان په دغې پیښه کې مسول وو، موږ غواړو هغه کسان چې په دغې پیښه کې لاس درلود په سزا ورسیږي.»

د بشري حقونو د څارې ادارې دا څیړونکې وايي چې امریکامتحده ایالاتونو په افغانستان کې د تیرو دولسو کلونو په موده کې د بشري حقونو د سړغونې پیښې لږې څیړلي دي.

هیدر بار وايي:«کله امریکایان ښې څیړنې ترسره کوي او مجرم په سزا رسوي، خو کله هم هیڅ څیړنه نکوي، دا پیښه هم داشان وه چې د امریکا دولت دا پیښه جدي نده نیولې.»

د وردګو ولایت د کلیوالو سیمو داوسیدونکو په وینا، تیر کال اته ملکي کسان د امریکايي ځواکونو او د هغو ژباړونکي لخوا په یولړ عملیاتو کې ووژل شول او لسو تنه نور امریکايي ځانګړو ځواکونو له ځانه سره یوړل چې له څه مودې وروسته د دغو لسو تنو مړي هم د امریکايي ځواکونو اډې ته نیږدې پیدا شول.

دغې پیښې د ولسمشر کرزي سخت غبرګون هم راوپاروه او په دغه ولایت کې امریکايي ځواکونو ته دوه اونۍ مهلت ورکړ چې له ولایت څخه بهر شي.