په کابل کې د امریکا سفارت په ټاکنو کې له ټولو ښکېلو خواوو غواړي چې ټاکنیزو مهال ویش ته دې درناوی وکړي او د ټاکنو کمېسیون ته دې اجازه ورکړي تر څو په رڼه او دقیقه توګه د ټاکنو پایله په خپل وخه اعلان کړي.

 د امریکا سفارت نن چهارشنبې(د تلې په ۱۷مه نېټه) په خپله ټویتر پاڼه دغه مطلب لیکلی دی.

 په همدې حال کې د ټاکنو پر خپلواک کمېسیون له بایومټریک دستګاو د مالوماتو مرکزي بانک ته د مالوماتو د پڅ بهیر لیږد له امله نیوکې دي.

 د ټاکنو خپلواک کمېسیون کمېنشر مولانا محمد عبدالله په خپل ټوېتر پاڼه لیکلي وو"که‎چېرې د ولسمشریزو ټاکنو بایومېټریک مالومات په دې بڼه پړاونه کچ کړي، د تلې په ۲۷مه به د ټاکنو د لومړنیو پایلو اعلان به ناشونی وي."

 هغه زیاته کړې وه چې:«له ولسمشریزو ټاکنو ۱۱ورځې وروسته د رایې ورکولو د ۲۶۵۰۰محلونو څخه د بایومېټریک ۲۲۴۰۰دستګاوو لومړني او د ۱۴۰۰۰دستګاوو وروستي مالومات د کمېسیون مالوماتي بانک ته لېږدول شوي دي.»

 هغه تګلاره چې د ټاکنو خپلواک کمېسیون غوره کړې وه د رایو ورکوکو بهیر له پای ته رسېدو وروسته د بایومېټریک دستګاوو ټول مالومات له انټرنټ سره له وصلولو وروسته باید په اتومات ډول د ټاکنو د خپلواک کمېسیون مرکزي دفتر ته لېږدول شوي وای، خو اوس چې له ټاکنو یوولس ورځې تېرېږي د دغو دستګاوو مالومات په بشپړه توګه نه دي لېږدول شوي.

 د ټاکنو خپلواک کمېسیون مسوولینو د مالوماتو لیږد کې ځنډ د انټرنټ ټیټ کیفیت بللی وو. خو نن بیا د ټاکنو خپلواک کمېسیون یوه غړي، اورنګ زیب وویل چې د انټرنټ ستونزه د هوارېدو په حال کې ده او د مالوماتو لیږد بهیر به چټک شي.