امنیتي چارواکو د پنجشنبې په ورځ وویل، د هرات ولایت په شینډنډ ولسوالۍ کې د امنیتي ځواکونو او وسله والو مخالفینو تر منځ په یوه نښته کې پنځه ولسي وګړي او یو سیمه ایز پولیس وژل شوي دي.
د هرات د ولایتي شورا یو غړی، تور محمد ظریفي وايي، طالبانو پرون مازدیرګر مهال د سیمه ایزو پولیسو پر یوه کاروان برید وکړ چې له امله یې یو پولیس مړ او بل ټپي شو.
خو پولیسو د خلکو پر کورونو ډزې وکړې چې په وینا یې په دغه پیښه کې د دوو ښځو، دوو نارینه وو او یو ماشوم په ګډون پنځه ملکیان ووژل شول.
د هرات د امنیه قومندانۍ د امنیت آمر، جنرال عبدالحمید حمیدي هم دا پیښه تاییدوي خو وايي، چې یواځې درې ښځې او یو سیمه ایز پولیس په دغه پیښه کې ټپیان شوې دي.
له بلې خوا په سرپل ولایت کې د سړک غاړې د ماین په چاودنه کې د چهارشنبې په ورځ د ملي اردو درې سرتیري وژل شوې او شپږ نور ټپیان شوې دي.
د سرپل د امنیه قومندانۍ د امنیت آمر، سخي داد حیدري وايي، دغه پیښه د سرپل ولایت په اختیار دره کې هغه مهال وشوه، چې د اردو د سرتیرو موټر د سړک غاړې په یوه ماین ور برابر شو.
